კომპანია Apple-ი მზადაა, ამერიკის 34 შტატში ძველი მოდელის iPhone-ების მუშაობის განზრახ შენელების გამო დაწყებული გამოძიებების შეჩერების სანაცვლოდ 113 მილიონი დოლარი გადაიხადოს. ამის შესახებ არიზონის შტატის გენერალურმა პროკურორმა, მარკ ბრნოვიჩმა განაცხადა.

Apple-ის წინააღმდეგ მიმდინარე გამოძიებას არიზონის, ინდიანისა და არკანზასის შტატები ხელმძღვანელობენ. პრეტენზიების დარეგულირება გამოძიების ფარგლებში კორპორაციის მხრიდან ბრალის აღიარებას არ ნიშნავს.

მარკ ბრნოვიჩის განცხადებით, კომპანია Apple-მა, ძველი მოდელის ტელეფონების მუშაობის შენელებით და უფრო ახალი მოდელების გაყიდვით დამატებითი სარგებელი მიიღო. შეთანხმების თანახმად, არიზონის შტატს Apple-ი 5 მილიონ დოლარს გადაუხდის.

2020 წლის მარტში Apple-მა გამოთქვა მზადყოფნა, გადაიხადოს 310-500 მილიონი დოლარი იმ სარჩელების დასაკმაყოფილებლად, რომლებიც iPhone-ების მფლობელებმა 2017-2018 წლებში შეიტანეს. 310 მილიონი დოლარი მინიმალური თანხაა, რომლის გადახდაც Apple-ს მოუწევს. თანხის საბოლოო ოდენობა დამოკიდებულება მოსარჩელეთა რაოდენობაზე. ამასთანავე, სასამართლო პროცესი ჯერ არ დასრულებულა. საქმეზე მორიგი სხდომა 4 დეკემბერს გაიმართება.